تكوين أصحاح 5

س : أصحاح خامسة صعب قوي و كله أسماء و أرقام ، إيه فايدة قراءته ؟
ج : علشان أقراء أصحاح زي ده ، لازم أطلع منه المعلومات المفيدة و أفكر فيها، ها لاقي حاجات جديدة ما كنتش أعرفها ، زي مثلا إن الناس كانوا بيعيشوا زمان وقت طويل ، و بيخلفوا أولادهم وهم كبارفي السن

آدم و أولاده

عدد سني حياته	عمره عند ميلاد الإبن المذكور في الكتاب	الاسم
930	130	آدم
912	150	شيث
905	90	آنوش
920	70	قينان
805	65	مهللئيل
962	162	يارد
365	65	أخنوخ
969	187	متوشالح
777	182	لامك
950	500	نوح

درس الجمعة 23 أكتوبر

الحياة بالإيمان

النص الكتابي : عبرانيين 11 : 1- 19

المقدمة :

لما الفلاح بيرمي البذر ويسقيه بالميه كل يوم ،

ياتري بيشوف البذرة وهي بتعمل جذر و تبتدي تكبر ؟

طيب ليه بيكمل يسقسي الزرع يوم بعد يوم ؟

لأنه عارف و متأكد إن الزرع هايكبر و ينمو

- لما واحد يكون مسافر بالطيارة لبلد بعيدة

بيقطع التذكرة و يركب الطيارة ، ياتري بيفضل يبص من شباك الطيارة علشان يتأكد إنه الطيار عارف السكة و ماشي صح مش ها يغلط في الطريق و يروح مكان تاني ؟ و لا بيقعد مسترخي في مكانه يتفرج علس فيلم ، يقراء في مجلة ، ينام ؟

طبعا مش بيبص من نافذة الطيارة لأنه مش ها يشوف حاجة ، و هو عارف و متأكد إن الطيار عارف السكة

النهاردة ها ندرس أصحاح في العهد الجديد ، بيتكلم عن ناس في التكوين والخروج لغاية يشوع عملوا حاجات كانوا مش شايفين التفاصيل بتاعتها ، لكن متأكدين من نهايتها

عب 11: 1 "واما الايمان فهو الثقة بما يرجى والايقان بامور لا ترى"

عبرانين 11 بيعلن لنا إن الايمان بيؤدي لعمل و تأثير الإيمان علي حياة المؤمن

المؤمن في كل العصور في كل المواقف

اللي بيعيش بالإيمان علي حسب " أمور لا تري" بدون ما يتوقف عند ما يري حتي لو كانت بتتعارض في الظاهر مع ما نراه

نتائج الايمان بتأتي نتيجة للنظر لله ومش لنفسه أو للي حواليه

الشخصيات اللي ها نفكر فيها هم: هابيل – نوح – إبراهيم – إبراهيم و سارة – موسي - يشوع

1. هابيل ← التبرير

ليه هابيل قدم ذبيحة من الحيوانات ؟

لأنه كان مصدق إن الإنسان خاطيء و إن الوسيلة الوحيدة للتقرب من الله هي عن طريق الذبيحة

وهو ده حالنا اليوم لو صدقنا إن الوسيلة الوحيدة للتقرب من الله هي المسيح الذبيحة الحية

2. نوح ← الشهادة

نوح طول ما كان بيبني الفلك كتنت الناس مستغربة فكان بيكلم الناس عن الخلاص اللي الله بيعده ليهم ، بالرغم إنه لم يري الطوفان و بني الفلك بناء علي تعليمات الله

3. إبراهيم ← الطاعة الكاملة

إبراهيم كان مثال كبير للطاعة ، كان بيسمع كلام الله في كل خطوة طلب منه حتي لو كان صعب و غريب ، و ينتظر إنه يفهم بعد كده . أولا لما ترك بيته و عائلته و إستقراره وعاش في خيام علشان ربنا وعده بأرض رائعة

بعد كده لما الله طلب منه يقدم إبنه لم يتردد بالرغم إنه مصدق وعد الله إن إسحق ها يكون أمة كبيرة

4. إبراهيم و سارة ← المثابرة

إبراهيم و سارة صدقوا وعد الله و ثبتوا علي الإيمان بالرغم من سنهم الكبير

5. موسي ← التخلي و الإلتزام

تخلي عن عيشة قصر فرعون و كل المميزات الأرضية (إبن الاميرة : قوة و نفوذ) و فضل إنه يلتزم بقضية تحرير شعبه ، و تكون أهم مشروع عنده

6. موسي أمام فرعون ← الحزم

قدام قوة فرعون و عناده، موسي كان حازم جدا و رفض أي "حلول وسط"

7. موسي أمام البحر الأحمر ← الحرية

شعب إسرائيل في هروبه كان في وضع مالوش حل ، البحر قدامه و فرعون و جنوده من خلفه. لكن إيمان موسي في قدرة الله الغير محدودة أعطت دفعة لإيمان الشعب

8. يشوع و أسوار أريحا ← الحياة المنتصرة

في الحرب و قدام أسوار أريحا العظيمة ، إنتظر الشعب مع يشوع بإيمان 7 أيام و طوال اليوم السابع وبسبب إيمانه و إيمان الشعب معاه قدر ينتصر في الحرب

الخلاصة : لما يكون عندي إيمان ها أكون بأتصرف زي الناس دي ؟

إزاي في سني الصغير ده ؟

- أقدم لله الذبيحة بتاعتي في الترينم و الصلاة و قراءة الكتاب ، ذبيحة كاملة من غير عيوب يرضي عنها الله

- لما الناس تسألني في المدرسة عن كل حاجة مختلفة في ّ (مش بأغش – مش بأشتم ) مأخجلش إني أشهد بسر إيماني ، يعني أقول إني بأعمل الحاجات اللي بترضي ربنا بس

- لما أشوف حاجة غلط في المدرسة أشترك فيها لأن كل الاصحاب بيعملوها و مش بيتعاقبوا

ولا أصدق إنه الله شايفنا دايما و بيحاسب كل واحد في الوقت المعين

صموئيل التاني 3 : 29 "يجازي الرب فاعل الشرّ كشرّه "

- أبطل أفكر في الحياة المرفهة في اللبس و الماركات والشهرة ، و أدور ربنا عايزمني أخدمه إزاي

عبرانيين 11 : 6 "ولكن بدون ايمان لا يمكن ارضاؤه لانه يجب ان الذي يأتي الى الله يؤمن بانه موجود وانه يجازي الذين يطلبونه"

تكوين أصحاح 2

س : تكوين 2 عدد1 : "فأكملت السموات و الأرض و كل جندها " يعني إيه "و كل جندها"
ج : كل جندها بيقصد بيها " كل ما فيها

س: تكوين 2 عدد9 : ذكر الكتاب شجرتين بس بأسمائهم "شجرة معرفة الخير و الشر" و "شجرة الحياة" . ليه الشجرتين دول بالذات المذكورة أسمائهم ؟
ج : الشجرتين دول مذكورين علشان لهم دور في الأحداث اللي بعدها، شجرة معرفة الخير و الشر هي اللي ماكانش مفروض آدم و حواء يأكلوا منها ، و شجرة الحياة مكتوب عنها في الأصحاح الثالث إن الله وضع عليها ملاك يحرسها علشان آدم لا يأكل منها لأنه ما بقاش بيتمتع بحياة الشركة مع الله

تكوين أصحاح 1

أصدقائي ،
في الجزء ده من الblog ها تلاقوا أسئلتكم في سفر التكوين اللي اتناقشنا فيها مع بعض + ممكن تكتبوا أي سؤال يقابلكم أثناء قراءاتكم ، و أنا ها أحاول أقدم لكم الإجابة

س : في أصحاح 1 عدد 7 " وقال الله ليكن جلد... يعني إيه جلد ؟
ج : جلد في ترجمات في لغات تانية يعني "مساحة " او "مسافة" ، يعني الله عمل مسافة بين المياه اللي فوق ( السحاب) و المياه اللي تحت (البحر) ـ المسافة ديه هي السماء

س : في أصحاح 1 عدد26 مكتوب إن الله خلق الإنسان ... بدون تفاصيل عن آدم و حواء
ج : لأن الأصحاح الأول فيه ملخص كل الخليقة في السبعة أيام ، لكن لأن خلق الإنسان موضوع مهم ، علشان كده الأصحاح التاني بيرجع يقدم بالتفصيل عملية خلق آدم و حواء إزاي تمت، ووصية الله لهم ...الخ

درس الجمعة 9 أكتوبر

أنا فين ؟

المقدمة :
لو جبنا زرعتين من نوع واحد ، واحدة حطيناها في الشمس و التانية حطيناها في الظل ، يا تري مين فيهم ها تنمو أسرع ؟
الإجابة المنطقية الأولي هي إن الزرعة اللي في النور ها تكبر و اللي في الظلام مش ها تكبر.
لكن المفاجأة ها تكون إن في الظلمة النبات ها ينمو أسرع في الأول.... لكنه برضة ها يموت أسرع


الموضوع :
لو فكرنا في الناس عامة ، ها نلاقي إنهم بينقسموا لمجموعتين فقط في نظر الله.
الله لا يري الفروق بين الناس علي أساس الاديان ( مسلمين – مسيحيين – يهود – بهائيين – بوذيين – هندوس ...إلخ)
ولا علي أساس اللون (بيض – سود – صفر)
و لا علي أساس الجنسية
و لا علي أساس الغني و الفقر و الإمكانيات
و لا علي أساس الطباع ( شخص لطيف – شخص مرح ...)

لكن علي أساس هو فين ؟ في النور ولا في الظلمة

تعالوا نشوف أفسس 5 : 8 بيقول إيه

لانكم كنتم قبلا ظلمة واما الآن فنور في الرب.اسلكوا كاولاد نور.

يا تري شكلهم إيه أولاد النور ، و شكلهم إيه أولاد الظلمة ؟
ممكن نقارن بين النوعين من الناس كما يلي

أولاد الظلمة
و أولاد النور

من هو أبوهم ؟
في يوحنا 8 : 44 "انتم من اب هو ابليس وشهوات ابيكم تريدون ان تعملوا."

أولاد الظلمة أبوهم هو إبليس

و في يوحنا 1 : 12 " واما كل الذين قبلوه فاعطاهم سلطانا ان يصيروا اولاد الله اي المؤمنون باسمه"

أولاد النور الله هو أبوهم

كل واحد لازم يعرف مين هو أبوه ، لكن إزاي يعرف ؟
سلوكي بيحدد مين هو أبويا
أولاد النور سلوكهم بيعبر عنهم ، و كل شهوة إبليس إننا نكون سلوكنا بيشبهه

إزاي بيسلكوا ؟
إبن الظلمة
- بتكلم ببجاحة
- تصرفاته سيئة
- كلامه زي الطوب
- لا يخاف أحد
- لا يحترم قانون
- مؤذي
- كذاب
- لا يحب الكتاب المقدس
و لو عرفنا إن الخطية تلد خطية ها نعرف إنه ممكن يوصل للسرقة و القتل.

إبن النور
- حياتهم واضحة للناس
- بيحبوا غيرهم أكتر من نفسهم
- كلامه رقيق
- فيه مخافة الله
- يحترم القوانين
- يعمل الخير للآخرين
- غيؤ مؤذي
- صادق
- يحب الكتاب المقدس


ملحوظة مهمة : ممكن أكون بأروح الكنيسة ، مواظب علي الإجتماعات و مدارس الاحد و بأشترك في فرق ترانيم لكني مش من أولاد النور

ما هو مصيرهم ؟

مصير أولاد الظلمة هو الجحيم
وصف جهنم في الكتاب المقدس إنه
- نار لا تطفئ
- بحيرة متقدة من نار و كبريت
- دود لا يموت
- عذاب
و يكفي أن يسوع المسيح غير موجود

مصير أولاد النور هو الحياة الإبدية مع الرب يسوع و الكتاب بيوصفها بالهناء و الفرح و التسبيح و الإستمتاع بالمسيح

سؤال مهم : ليه ربنا خلق الجحيم ؟ هل يحب الله أن يعاقب اللإنسان اللي خلقه و بيحبه ؟
الإجابه : الجحيم خلق لمعاقبة إبليس لكن إبليس بيحاول ياخد الإنسان معاه
في يوحنا 10 :10 مكتوب " السارق لا يأتي الا ليسرق ويذبح ويهلك.واما انا فقد أتيت لتكون لهم حياة وليكون لهم افضل."

إبليس يريد أن يسرق / يذبح / يهلك
الله يريد أن تكون لنا حياة / أفضل حياة


و السؤال الأخير : إنت فين ؟

أول رسالة

أهلا بكم في مدونة بتاعتكم
الهدف منها هو التواصل بيننا طول الوقت
المكان ده مكان تفكير .. تعبير.. حرية

• بعد كل يوم جمعة ها تلاقوا الدرس موجود، لو حد ما قدرش يكون موجود ، ها يعرف إحنا عملنا إيه
• وفي يوم أجازاتكم ، تقدروا تدخلوا علي الblog علشان تشوفوا إيه الجديد : ممكن يكون فيه أخبار أو مقاطع video أو موضوع للمناقشة
• ممكن كمان تكتبوا أسئلتكم في مواضيع الخلوة الشخصية و بعد وقت قصير تشوفوا الإجابة .
• اللي نفسه يبعت أي مشاركة علشان الكل يعرفها و يستفاد منها.